Antolakuntza on bat oinarri izanik, bailarako gazte oro, langile nahiz langabetu, Zizurkilen elkartzea zen Aiztondoko Gazte Asanbladak gaurko egunerako jarritako helburua. "Pandemiaren eraginez, gazteak nahikoa isolatuta egon gara azken hilabeteetan, eta beraz, bestelako ekintza batzuen bitartez elkarrekin egon gaitezen antolatu dugu eguna", adierazi dute.
Giro oso onean igaro dira goizeko ekintzak. Batetik, 20 bat lagunek hartu dute parte street bolder txapelketan; bestetik, Aiztondoko Gazte Asanbladaren eta bestelako mugimendu politikoek izandako ibilbideak azaltzeko hitzaldian ere gazte ugari batu da.
Eguerdian, berriz, ia 50 gazte elkartu dira Joxe Arregi Plazan egin duten bazkarian; ondoren, bingo musikatua egin dute. Une honetan, Distopia elektrotxaranga herriko kaleak girotzen ari da; gauean, berriz, BassAgain soinu sistema eta No te Crew taldea izango dira bertan.
Asanbladako kideen iritziz, Gazte Eguna "aitzakia ona" izan ohi da bailarako gazteak erakartzeko, baina batez ere, Aiztondoko Asanbladaren berri gertuagotik izateko. "Batik bat, antolakuntzara batu daitezen nahi dugu", nabarmendu dute.