Jarraian Zizurkilgo Udalak argitaratu duen oharra:
Uztailaren 24an hartu ziren behin behineko neurri guztiak bertan behera utzi ditu Zizurkilgo Udalak. Plazida Otaño liburutegiko langile baten gertuko senideak COVID19aren proban positibo emateak ekarri zuen liburutegia itxi eta Udal bulegoak aurretiazko hitzorduaren funtzionamendura itzularaztea, baina kutsatutako pertsonaren inguru hurbilenekoei egindako bigarren PCR probek ere negatibo eman dute. Beraz, gaurtik ohiko jardunean ari dira Joxe Arregi plazako Udal bulegoak. Liburutegiak berriz, opor garaia du hau, baina ikusirik joan den astean itxita egon zela bi goizetan irekiko da liburuak utzi, edo bereziki, oporretarako hartu nahi dituztenentzat. Gaur, abuztuak 3 irekita egon da goizez eta bihar abuztuak 4 ere horrela egongo da 10:00etatik 13:00etara. Egunotan itxita egon den Bordatxo taberna ere irekiko da, segurtasun osoz.
Bien bitartean, konfinatuta jarraitzen dute Aurrera plazako bi etxebizitzetako bizilagunek baina herrian ez da kasu gehiago izan momentuz. Zizurkilgo Udalak arduraz jokatzeko deia egiten die herritarrei eta orain arte bezala duen informazioa helarazteko konpromisoa hartzen du.