Kirol Astea ospatu zuten aurrekoan Zizurkilen eta bihartik aurrera Liburuaren Astean murgilduko dira. Iker Urruzola alkateak nabarmendu duenez, «kirola eta liburu artean ibiltzea bateragarria dela azpimarratu nahi dugu».
Urtero gai baten inguruan antolatzen dituzte Liburuaren Asteko ekitaldiak eta Arantxa Zabala Plazida Otañoko liburuzainak aipatu du, aurten, «kultura aniztasuna» izango dutela ardatz nagusia. Giza Eskubideen Nazioarteko Eguna izan zen joan den astean, eta bihar, Migratzaileen Nazioarteko Eguna denez, bi data horiei egin nahi izan diete erreferentzia aste honetan.
SOS Arrazakeria elkarteak, ostirala bitartean, Gureak ere badira adingabe horiek izeneko erakusketa jarriko du Plazida Otaño liburutegiko erakusketa gelan. Eta Mexikoko Mestizas elkarteko eta Nigeriako emakumeek osatzen duten Divinas elkarteko kideek ipuinak kontatuko dituzte, gaur eta etzi.
Bihar Pape Niang senegaldarraren bizipenak biltzen dituen Hasiera berri bat liburua aurkeztuko dute Niangek berak eta Mikel Garcia Idiakez kazetariak. Eta ostiralean amaituko dute astea, Teodoro Hernandorena eta Booktrailer lehiaketen sari banaketa ekitaldiarekin.
LIBURUAREN ASTEA 2019
Gaur, abenduak 17
17:30.Herriguneko Iriarte kultur etxean Mestiza Mexikoko elkarte artistiko eta sozio-kulturalak ipuin kontaketa egingo du, euskaraz, gaztaniaz eta ingelesez.
Bihar, abenduak 18
19:00.Hasiera berri batliburua aurkeztuko dute Pape Niang eta Mikel Garcia Idiakezek Plazida Otaño liburutegian.
Abenduak 19, osteguna
17:30.Divinas Nigeriako emakumeek osatutako elkarteko kideek ipuina kontatuko dute Plazida Otaño liburutegian. Euskaraz, gaztelaniaz eta Igbo hizkuntzan eskainiko dira.
Abenduak 20, ostirala
17:30.Teodoro Hernandorena ipuin lehiaketako eta Booktrailer lehiaketako sari banaketa ekitaldia Plazida Otañon.
