Goizeko 11:00etan Intxaur frontoian antolatu dituzten haurrentzako jolas eta tailerrekin hasi dira jarduerak, Zizurkilen. Hamaiketakoa eta opari banaketa ere egin dute, gainera. Arratsaldean, ekimen horiekin jarraitu dute, 18:00ak bitarte, eta segidan hasi da Zunbatoia saioa.
Zunbatoia ekitaldia, hasiera batean, frontoian bertan egitekoa zen, baina azkenean Zimiteriora aldatu dute, eliza atarian egin dutelarik. Bertan, haur nahiz gaztetxo batzuk, neska-mutil bikote baten gidaritzapean, hasi dira dantzan aurrena. Ondoren, inguruan begira zeuden gurasoetako batzuk ere animatu dira gorputzeko atal ezberdinak, musikaren erritmo berdinera mugitzera. Iluntzean jarraituko du kirol festak Zizurkilen.
Gaueko 22:00etatik aurrera, Haurren Gau Krosa ikusteko aukera izango da. Ordu erdi beranduago emango zaio irteera Zizurkilgo XXI. Gau Krosari, eta orduan, helduek izango dute korri egiteko aukera. Horrez gain, arratsaldeko 19:00etan hasita, kirolarientzako elikaduraren inguruko hitzaldi-tailerra eskaini dute, Atxulondo kultur etxean, Aitor Ugalde nutrizionistak eta Javi Rivero sukaldariak.