Berez, Lartingo zelaian ziren jokatzekoak arratsaldeko herri kirol probak. Baina, eguraldi nahasia zela eta, frontoian bilatu dute estalpea Zizurkilgo Gazte Asanbladako gazteek. Unai Mendizabal Mendi bertsolariaren esanetara, hamarreko bi taldetan banatu dira parte hartzaileak. Batzuk, morez jantzita, eta besteak, berriz, berdez. Honako proba hauek egin dituzte: Lokotx biltzea, trontzarekin egurra ebakitzea, ingudearekin hogei kolpe jotzea, sagar biltzea, eskorga gainean bi itzuli ematea eta ibilbide berari, korrika, hiru buelta ematea. Amaieran, sokatiran ere pare bat saio egin dituzte. Hemen ere, moreak nagusi.
Proba bakoitza banaka egin ostean, erreleboka aritu dira bi taldeak. Proba bakoitza bukatu orduko hasi da hurrena. Orokorrean, moreak izan dira garaile, baina hori gutxienekoa izan da. Ederki pasa dute gazteek, eta baita pilotalekura bertaratu direnek ere. Horren erakusle, amaierako txalo zaparrada. Arratsaldeko beste ekitaldi nagusiak, Añorga eta Zizurkilgo erraldoi eta buruhandien konpartsen topaketa, Falcons de Villafrancako (Katalunia) giza dorreen ikuskizuna, eta presoen eskubideen aldeko ardo dastaketa izan dira. Gauean, berriz, oilaskoa afaldu ondoren, Trakets taldearekin gaupasa egiteko aukera izango da.
