Arantzazuko Amaren Egunaren bueltan ospatzen dituzte Elbarrenako festak Zizurkilen. Jaiak girotzen joateko eta kuadrilla ezberdinen artean, festetako ardurak banatzen hasteko baliatzen dute Blusen eguna.
120 lagun inguru bildu dira, I love paella catering-ak prestatu duen bazkarira eta arratsaldean "gurpil" poteoa egin dute –bizikletan, patinetan, erosketen orgetan, umeen kotxeetan– eta jolasetan emandako pisten bidez, auzoz auzo ibili dira. Jolaserako, 2012an Zizurkilgo Udalak onartu zuen armarri berria hartu dute. "Zubia, zuhaitza eta mendia ageri dira armarrian eta konturatu gara, Zubimusu erdi botata dagoela, Zizurkil goiko zuhaitza ihartuta eta mendia AHTak zulatuta. Armarri berri bat proposatu nahi dugu gaur", esan dute umorez jolasak antolatzeaz arduratu diren kuadrillako kideak.
Gauean erromeriarekin bukatuko dute Blusen eguna. Elbarrenako festa batzordeak hurrengo hitzordua iraila hasieran izango du, Arantzazuko Amaren festetan.