Aurkariak, bi leitzar: Ruben Saralegi eta Jon Rekondo. Irabazleak sari handia zuen: finalerako txartela. Otaegik eta Lopez Azpilikuetak ezin izan zuten txartel hori lortu, 21 minutu eta 31 segundoko denboran amaitu baitzituzten lanak. Leitzarrak, 19 minutu eta 40 segundoan ibili ziren. Beraz, azken hauek jokatuko dute finala.
Otsailaren 28an, igandean, Azpeitian jokatuko da binakako txapelketaren finala. Izarraitz pilotalekuan hiru bikote hasiko dira lanean, 12:00etan. Azken sailkatuekin batera, iazko txapeldunak egongo dira: Aitzol Atutxa eta Ugaitz Mugertza. Horiekin batera, txapela irabazteko faborito nagusiak: Laurece O’Toole australiarra eta Iker Vicente nafarra.