Jun da Jo txarangak lagunduta atzo arratsaldeko 19:00etan atera zen danborrada herrikoia plazatik eta herrian itzuli bat egin ondoren itzuli zen plazara. Tartean Oporretan Euskarazekoen eskutik herriko haurrek jolas kantak egin zituzten.
20:00etan puntuan, Ordago blusako kideak igo ziren Pasus etxeko balkoira. Aurten, Atxulondo kultur etxean egiten ari diren lanengatik aldatu dute txupinazoa botatzeko tokia. Melokotoiak egin zituen aurkezpen lanak: "jai herrikoi eta parte hartzaileago batzuen alde Ordagok egin duen lana eskertu nahi dugu, gainerakoentzat eredu izan baitzarete".
Txantxa artean, beteranoak direla eta erretiroa hartzeko gonbita luzatu zien Melokotoiak, "errelebo kontratuan pentsatzen hasi beharko duzue". Azkar hartu zuten hitza Ordago blusakoek: "ez gaude erreleboetarako eta aurten ere, etxera erretiratzen azkenekoak izango garela ziurtatzen dizuegu". Opariak ere jaso zituzten festa batzordearen eskutik, aginte makila eta zatoa eraman zituzten aldean.
Falta diren herritarrak izan zituzten gogoan Ordago blusakoek, baina bereziki birekin gogoratu ziren: Anttonio zendutako euren kidearekin eta Gregoriorekin, espetxean daukaten lagunarekin.
Suziria bota eta txanpain botilak astindu ondoren, danborradako kideak plazan pieza pare bat eskaini eta beste itzuli bat eman zuten Ubare auzoan barrena. Olentzo jatetxeak jarri zuen afaria atzo tea goizaldera karaokea izan zuten festen lehen egunari amaiera emateko.
