Zizurkilgo Udalak bat egin du Europar Batzordeko elikagai programa batekin eta honenbestez, elikagai bankua abian da herrian. Martxoan egin zen lehenengo elikagai banaketa. Aurrerantzean ere, 4 hilabetez behin, herrian beharrean dauden familiei janari sorta handiak banatuko zaizkie. Gaur egun, beharrean diren herriko 72 familiek eman dute izena elikagai horiek hartzeko.
Banaketa egiteko, ordea, ezinbestekoa da familia bakoitzaren beharren araberako janari sortak egitea. Aurreko aldian bezala, boluntarioen laguntza beharko da oraingoan ere. Sortak egiteko eguna uztailak 26, larunbat goizez, izango da. “Janariak aste horretan iritsiko dira eta larunbatean sortak eginez gero, uztaileko azken astean banaketa egiteko moduan izango dira gizarte langileak”, azaldu du Nerea Lizarraga ongizate zinegotziak. Lan txandetan parte hartu nahi duenak bi modu ditu: Aiztondo mankomunitatean izena emanda edo 943 69 39 30 telefono zenbakira deituta. Lehen banaketan herritarren erantzuna bikaina izan zen, eta oraingoan ere, Zizurkilgo Udalak parte hartzeko deia egin nahi du.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!