Zizurkilgo Huyck Wangner enpresako langileek ezezkoa eman die zuzendaritzak egindako azken eskaintzari, eta euren lanpostuak defendatzeko «borrokan» jarraituko dutela azaldu dute.
Bigarren Enplegu Erregulazio Espedientea sartu zutenetik hirugarren bilera izan zuten iragan ostiralean lantegiko langile batzordeak eta enpresaren zuzendaritzak. Mikel Zabaleta ELA sindikatuko ordezkariak azaldu duenez, «zuzendaritzak estreinakoz onartu zuen 75 langile kaleratzeko espedientea ez dagoela Zizurkilgo lantegiaren datuetan oinarrituta». «Sektorea krisian dagoela, eta taldea bere osotasunean egoera txarrean dagoenez, enpresa osoa kontua hartuta hartu dutela erabakia esan digute», adierazi du Zabaletak.
Enpresak kalte ordaina 40 egunera igo du, 18 hilabeteko mugarekin. Halaber, enpresak beste lurraldeetan dituen ordezkaritzetan 13 langilerentzako lanpostua bermatzen zuela azaldua zuen, eta horientzat erraztasun handiagoak agindu ditu. «Gure iritziz, enpresa honek irabazten duen dirutza eta hemendik eman duten diru pila kontuan hartuta, hori huskeria da», azaldu du Zabaletak.
Enplegu Erregulazio Espedientearen kontsulta epea apirilaren 25ean bukatuko da. Hori murrizteko aukera bakarra bi aldeak adostasunera iristea litzateke. «Egun horretara iritsi bitarte ez badago adostasunik, kaleratzeak komunikatuko lituzkete, eta ondoren guk salaketa jarriko genuke», dio Zabaletak. «Geroz eta informazio gehiago izan are gehiago konturatzen gara bidegabekeria handia izan dela dena, eta langileek oso argi dute euren lanpostuen defentsan jarraituko dutela borrokan».