Ikaztegietako pilotalekuan jokatuko dituzte Gipuzkoako Herri Txikietako Areto Futboleko Kopako finalak etzi, larunbata. 16:30ean hasiko da lehen partida, A mailako finala. Bidania-Goiatz taldeak, gaur egungo txapeldunak eta aurten ere liga irabazi duenak, Leaburu-Txaramako Uzturre taldearen aurka jokatuko du.
Ondoren, maila bereko hirugarren eta laugarren postuak erabakitzeko partida jokatuko dute Ikaztegietako Kutturru A eta Elgeta taldeek.
Hirugarren eta azken partida B mailako finala izango da. Partida hori Itsasondoko Ijitok eta Ikaztegietako Kutturru B taldeek jokatuko dute elkarren aurka.
Behin partidak amaituta, sari banaketa egingo dute, baita zozketak ere. Larunbateko jardunaldiarekin emango diote amaiera aurtengo denboraldiari.