Itzulia Women probak hiru etapa izango ditu, eta bihar hasi eta igandean bukatuko da. Laboral Kutxa - Euskadi Fundazioa taldeko Naia Amondarain ibartarrak parte hartuko du, eta 51. zenbakia eramango du.
Lehenengo etapa Zarautzen hasi eta bukatuko da, eta Bidania-Goiatz herritik pasatuko da. 121,3 kilometro izango ditu eta 2.400 metroko desnibel positiboa. Guztira sei mendate igo beharko dituzte txirrindulariek. Bidania-Goiatzera Beizamatik pasatu ondoren eta Santa Ageda mendatea igo eta gero iritsiko dira. Aurreikuspenen arabera Beizamatik 12:03ean pasatuko dira, Bidania-Goiaztik 12:15ean eta Errezildik 12:25ean. Errepidea 45 bat minutu lehenago moztuko dela jakinarazi du Itzulia Women probako antolakuntzak.
Bigarren etapa, larunbatekoa, Abadiño eta Amorebieta-Etxano artekoa izango da. 138 kilometro, bost mendate eta 2.560 metroko desnibel positiboa izango ditu. Hirugarren etapa, igandekoa, Donostian hasi eta bukatuko da. 113 kilometro izango ditu, hiru mendate, tartean Jaizkibel eta Mendizorrotz, eta 1.840 metroko desnibel positiboa.