Eskuz, Zizurkil eta Alegia Herriartekotik kanpora

Final-hamaseirenetako kanporaketak bukatu berri dira Herriarteko Pilota Txapelketan, eta eskualdeko parte hartzaile gehienek aurrera egin dute. Eskuzko modalitatean bidean geratu dira Alegia eta Zizurkil. Alegia joaneko jardunaldian 2-1 aurretik zegoen Aretxabaletaren aurka, baina itzulerakoan 2-1 galdu dute etxean jokatutako jardunaldia, eta azkenean alegiarrek hamar tanto gutxiago egin dituzte eta hor erabaki da kanporaketa. Zizurkilek 2-1 galdu zuen joanekoa eta markagailu bera lortu dute itzulerakoan Aiaren aurka.

Aurrera egin dutenen artean, Albizturrek kanporaketari buelta eman dio, etxean Astigarragaren aurka 1-2 galdu ondoren. Aurkarien pilotalekuan 2-1 irabazi zuten, eta tanto kopuruek Albizturren alde erabaki dute kanporaketa. Final-zortzirenetan Zaldibia izango dute aurkari. Adunak etxean 3-0 irabazita kanporaketa bideratu zuen Oñatiren aurka, eta itzulerakoan 2-1 irabazi dute. Hurrengo kanporaketa Zestoaren aurka izango dute. Amasa-Villabonak Donostiari bi jardunaldietan 2-1 irabazi die, eta orain aurkaria Bergara izango dute. Amezketak ere markagailu berarekin egin du aurrera, 4-2 gainditu baitu Lazkao; final-zortzirenetan Azpeitia izango da aurkaria.

Gomazko paletan eskualdeko hiru herri parte hartzaileek egin dute aurrera. Tolosak izan du meritua markagailuari buelta emateko. Zumarragaren aurka 2-1 galdu ondoren, Beotibarren jokatutako itzulerako jardunaldian 2-1 irabazi, eta tanto kopuruengatik egin dute aurrera. Lasarte-Oria izango da aurkaria hurrengo kanporaketan. Anoetaren kasuan bi jardunaldietako partida guztiak irabazita gainditu dute Errenteria, eta orain Donostia izango dute aurkari. Alegiak 2-1 abantailarekin jokatu zuen itzulerakoa etxean, eta 3-0 irabaztea lortu eta aise igaro dute kanporaketa; orain Oiartzunen aurka jokatuko dute final-zortzirenetako kanporaketa.

Tolosaldeko herriak - Gipuzkoako Herriarteko Esku Pilota Txapelketa

Tolosaldeko herriak - Gipuzkoako Herriarteko Gomazko Paleta Txapelketa