ELA eta LAB sindikatuek deituta Udalhitz hitzarmenaren negoziazioa blokeatuta dagoela salatzeko lanuzteak egin dituzte gaur udal administrazioko langileek.
EAEko tokiko erakundeetako langileen lan baldintzak arautzen dituen hitzarmena da Udalhitz, eta langileek salatu dute hura berritzeko negoziazioak aspalditik daudela blokeatuta. Otsailaren amaieran eta martxoan sindikatuek hainbat udalerritan eta Eudelen egoitza atarian mobilizazioak egin zituzten.
Negoziazioa behartzeko, bi orduko lanuzteak egin dituzte gaur langileek udaletako lan baldintzak bertan erabaki daitezen eskatzeko. Udalhitzen eta udaletan edukiak orain! leloa eraman dute mobilizazioek. 11:00etatik 13:00etara egin dituzte lanuzteak eta udal eraikinaren atarietan kontzentratu dira langileak.
ELA eta LAB sindikatuek gaur zabaldu dutenez Tolosaldeko honako herrietan egin dituzte lanuzteak: Tolosan, Alegian, Ibarran, Anoetan, Iruran, Leaburu-Txaraman eta Zizurkilen.