TOPA plataformak eskerrak eman dizkie ekainaren 14an egindako giza katean parte hartu zutenei eta balorazio positiboa egin duela gaineratu du. «Berriro ere agerian gelditu da Tolosaldeko herritarrok gainerako eskualdeek dutenaren antzeko eskualdeko ospitale publikoa nahi dugula eta ez garela konformatuko ez promesa faltsuekin, ez Donostia Ospitalearen adar bat izango den erresoluzio handiko zentro batekin».
Osasun Sailak Tolosalderako duen planaren inguruko zalantza asko dituztela esan dute plataformatik: «Zein da agindutako osasun zentro horren Plan Funtzionala? Zer behar hartu ditu kontuan Eusko Jaurlaritzak planak egiteko? Beste bost urte egon behar al dugu Tolosaldeko osasungintzaren arazoa konponduko ez duen zentro baten zain? Zer gertatuko da Asuncion Klinikako langileekin?».
Horiek horrela, esan dute garbi dutela euren eskaerek indarrean jarraitzen dutela, eta horregatik irailean berriro helduko dietela mobilizazioei «eskualde honek behar duen konponbidea lortu arte».