Gizonezkoen mailan jokatuko da, 12:00etan hasita, Arizmendiko belardian. Hiru izango dira parte hartuko duten segalariak: Mikel Lizartza tolosarrak, Julen Gabirondo urnietarrak eta Jon Larrañaga oiartzuarrak. Segalariek 1.000 metro karratuko saila moztu beharko dute ahal den denbora gutxienean. Txukuntasunak ere bere balioa du, eta epaileek denborarekin zigortu dezakete segalaria horren arabera.
Txapelketaz gain, erakustaldia ere izango da igandean Zizurkilen, eta ikusmina sortzen ari da zaleen artean. Segalari beteranoen artekoa izango da saioa, eta bertan parte hartuko du Juan Manuel Erasun zizurkildarrak. Berarekin batera Leon Albeniz eta Jose Antonio Matxain ariko dira segan.