Pasa den ekainaren 7an bete zen mende bat Tolosaldeko mendizale talde batek 14 Orduko Ibilaldia lehen aldiz egin zuenetik. 1925eko ekainaren 7a zen eta mendizale haiek 04:00etan irten ziren Tolosako Plaza Zaharretik. San Migelera joan ziren eta handik Tolosara itzuli ziren. 23:40ean iritsi ziren Fronton kafetegira.
Mendizale haien lekukoa Aralarko Adiskideak taldeak hartu zuen eta urteurrena baliatuz hainbat ekitaldi antolatu dituzte; Aranburu jauregian jarritako erakusketa, hitzaldi bat eta bideo bat. Baina bada gehiago, izan ere pasa den larunbatean 14 mendizale elkartu eta berriz ere egin zuten XIV Orduak ibilbidea. Hauek ere 04:00etan irten ziren Tolosatik, Plaza Zaharretik, eta ibilbidea eginda, 23:20ean iritsi ziren Fronton-era. Taldea 12 gizonezkok eta 2 emakumek osatu zuten, horien artean duela 100 urte ibilbidea egin zuten aitzindarien seme bat eta 6 biloba.