Kanporaketa hasi aurretik faborito ziren amezketarrak, eta horrela erakutsi dute kantxan. Joaneko jardunaldia berez Villabonan jokatzekoa zen, baina bi herrietako agenda kontuengatik Amezketako Larrunarri pilotalekuan jokatu da. Hori bai, gorriz billabonatarrek jokatu dute.
Amasa-Villabonatik kadete mailan Imanol Zufiriak eta Beñat Larrartek jokatu dute, eta 10-22 galdu dute Amezketako Igor Goñi eta Oihan Gorostidiren aurka. Jubeniletan ere 10-22 galdu du Amasa-Villabonak: Unai Zufiria eta Eñaut Oñate aritu dira, eta Amezketatik Oihan Fresneda eta Ametz Gorostidi. Nagusietan alde handia izan da: Amasa-Villabonako Aimar Iraolak eta Eñaut Aranburuk 3-22 galdu dute Amezketako Eneko eta Beñat Gorostidi anaien aurka.