Larunbatean iritsiko dira urtero bezala kaldereroak Tolosara inauteriak datozela iragartzera. Plaza Zaharrean bilduko dira konpartsako kideak 18:45ean , segidan, Alde Zaharreko kaleak zeharkatzeko. Bezperan, ohi bezala, Loatzo musika eskolak antolatutako kalejira egingo dute Irura eta Anoeta artean.
Loatzoko kideek kaldereroz janztera eta zartagina eta mailua eramatera animatu dituzte herritarrak. Irurako plazatik abiatuko da kalejira bihar 18:00etan eta Anoetara bitarteko bidea egingo dute ondoren. Hango plazan amaituko dute saioa eta parte hartzaileentzat merienda egongo dela jakinarazi dute antolatzaileek.
Bihar, baita ere, Tolosako Eduardo Mokoroa musika eskolako kaldereroen kontzertua izango da Topic aretoan, 19:00etan hasita.
Urdiña Txiki elkarteak antolatzen du kaldereroen konpartsa Tolosan eta etzi festari hasiera emateko 19:00etan udaletxetik botako dute pregoia. Segidan abiatuko dira kalez kale ohiturazko ibilbidea egiteko: Solana kalea, Korreo kalea, Gorriti plaza eta Kale Nagusitik bueltatuko dira Plaza Zaharrera.
50 musikaritik gora elkartzen dira Tolosako kaldereroen kalejiran. Hasierako taldeko musikariez gain, kaldereroen banda herrikoia ateratzen da. Bertan, Tolosako Musika Bandako kideak, Udal Musika Eskolako Ikasleen Bandakoak eta herriko beste musikariak nahasten dira. Txomin Arostegik egingo ditu zuzendari lanak eta haren aldamenean joango dira zingaroen orkestra, abesbatza eta dantza taldea; Koldo Tarragonak zuzenduko du orkestra; Iñigo Vivanco eta Jose Gozategi arduratuko dira abesbatzaz; eta Ane Calvo dantza taldeaz.
Hiru pieza jotzen dituzte egun horretan. Kalejiran, kalez kale joaten direnean, Kaldererotako kalejira deitutakoa jotzen dute eta, gero, geldirik daudela, Kaldereroen abesbatza eta Kalderero hungariarrak lanean. Ibilbidean zehar egiten dituzten geldialdietan jotzen dituzte pieza horiek, eta jendeak abestu egiten du, zartaginekin lagunduta. Dantzariak ere arituko dira tartean.
Urdiña txikik esker ona
Urdiña Txiki elkarteak esker ona adierazi die Tolosako Udal Musika Eskolako Ikasleen Bandako Migel Angel Morenori eta Tolosako Udal Musika Bandako zuzendari Enrike Arostegiri, «kaldereroen konpartsa laguntzen agertu duten eskuzabaltasunagatik». Aldi berean, elkarteak adierazi du ezinbestekoa dela konpartsa zuzentzeko ardura hartzen dutenen lana, «baita itzalean aritzen direnena ere, haiek gabe ezinezkoa izango litzateke hainbesteko ohitura duen kaldereroen kalejira egitea». Bide batez, Udaltzaingoaren lankidetza eskertu du Urdiña Txiki elkarteak eta baita herritar guztiena ere, «tolosarrak baitira, azken finean, pastelari ginga jartzen diotenak».
Iaz, 50. urteurrena ospatu zuen Urdiña Txiki elkartearen konpartsak eta ohitura jarraituz, beste behin Tolosako herritarrei inauteriei ongietorria emateko deia luzatu diete antolatzaileek. Behin kalejira amaituta, 23:30ean, Incansables txaranga ariko da kalez kale. Inauterietako lehenengo doinuak entzungo dira, beraz, etzi Tolosako kaleetan.