Zaldibiako plazan egin zuten elkarretaratzea, atzo. 150 pertsona inguruk egin zuten bat deialdiarekin, tartean Enirio-Aralar Mankomunitateko hainbat alkate eta zinegotzik eta Ahal Dugu zein EH Bildu alderdi politikoetako ordezkariak.
Deialdia Landarlan Ingurumen Elkarteak eta Aralar Bizirik taldeak egin zuten. Erasoa jasandako kideari eta bere familiari elkartasuna eta babesa adierazi zieten eta edozein eratako erasoak «erabat onartezinak» direla esan zuten: «Ez du axola zein den pertsona, ezta arrazoia ere. Horrelako jarrerek ezin dute lekurik izan gure jendartean. Horregatik, denok, erakundeetako ordezkari nahiz herritar xume, aho batez gaitzetsi behar ditugu horrelako jokabideak. Hori aldarrikatzeko gaude hemen». Esan zuten ez dela lehen aldia erasoak eta mehatxuak jasotzen dituztela; «2016an pisten eraikuntza abiatu zenetik Aralarren eta inguruan erasoak eta mehatxuak izan dira. Ez dugu zalantzan jartzen horrelako jokabideak gutxiengo baten kontua direla, baina era berean, oso deigarria egiten zaigu pertsona horiek duten inpunitatea eta babesa».
Aurrerantzean antzerako egoerarik ez errepikatzea espero dute eta elkarbizitza aldarrikatu zuten. «Sektore eta interes ezberdinak dituztenen arteko elkarlana, zientzian oinarritutako irizpide teknikoak eta interes orokorra defendatuko duten erakundeen gidaritza behar ditugu», gaineratu zuten.