Gizonezkoak gehiengoa badira ere, geroz eta gehiago dira pista konkistatzen duten emakumeak. Horietako batzuk dira Ines Puyadena (Zizurkil, 1985), Irati Atxa (Zegama, 1995) eta Maria Aranberri (Nuarbe, 1996). Lasterketak ikustera joateko afizioa aurretik bazuten ere, «kasualitatez» iritsi zitzaien bertan parte hartzeko aukera. Hiruak, normalean, kopilotu lanetan aritzen dira eta orain, San Migel Rallysprinta antolatzeko erronkari eutsi diote.
Hain zuzen ere, lehen aldiz, emakumeek bakarrik antolatu duten auto lasterketa egingo dute larunbatean. Informazio guztia Emakumeak Automobilismoan taldearen Instagram kontuan (@emakumeakautomobilismoan) edo Euskadiko Automobilismo Federazioaren webgunean izango da ikusgai.