Ikaztegietan izango da asteburu honetan Alegiako Intxurre antzerki taldea Jo ezak berriro, Sam! obrarekin. Hasieran larunbatean egiteko asmoa zuten, baina emanaldiak «izandako harrera dela medio», igandean bigarren saio bat egitea erabaki dute Ikaztegietako Udalak eta antzerki taldeak.
Bi emanaldiak kiroldegiko beheko gimnasioan izango dira: lehena, larunbatean, 22:00etan; eta, bigarrena, igandean, 12:00etan. Geratzen diren «sarrera apurrak» gaur arratsaldean eskuratu ahal izango dira Ikaztegietako udaletxean, 16:30etik 18:30era. Horrez gain, Tolosan ere eskainiko dute uztailaren 3an, Amarotz auzoko Antzerki astean.
Estreinaldi ondorena
Asteon Ikaztegietan egingo dute, eta joan den astean estreinatu zuten Alegian. Hiru saio egin dituzte Alegiako zineman, guztietan agortu dira sarrerak eta, antolatzaileen arabera, 500 lagun baino gehiagok ikusi dute antzezlana.
Asteburu «sutsua zein bizia» izan da Intxurre antzerki taldekoentzat eta eskerrak eman dizkiete emanaldia ikustera joan direnei: «Hiru egun zoragarri izan dira, aukera izan baitugu denbora luzeko lana erakusteko. Azken emaitza bezain garrantzitsua eta ederra izan da bizitako prozesua, eta osoki bete gaitu herritarrengandik jasotako berotasunak. Orain inguruko herrietan jarraituko dugu edertasun hau luzatzen, lana ahalik ondoen eginez; eskerrik asko».