Duela lauzpabost urte kostaldera irteerak egiteko dinamika jarri zuten martxan Bidania-Goiazko eta Errezilgo (Gipuzkoa) eguneko zentroetan. Irteera egunean zentroak itxi eta egunpasa itsasoa ikustera joateko ohitura hartu zuten onuradunek eta langileek, baina hainbat arrazoi zirela medio, egiteari utzi zioten. Usadioa birsortu nahi dute Saiaz Mankomunitatetik, eta bihar egingo dute estreinako irteera Oriora (Gipuzkoa).
Hiru herrien artean, guztira, 32 bat adinekok eman dute izena irteeran. Goizetik abiatu eta bazkalordura arte Orion egongo dira; eguerdian, Boga Boga jatetxean bazkalduko dute eta arratsaldean itzuliko dira.
Galdu eta berreskuratu
Aurrez aipatutako eguneko zentroetan irteerak egiteari utzi zioten hainbat arrazoirengatik, besteak beste, lehen egoiliar gutxiago zituzten eta horiek irteerak egiteko «baldintzak betetzen» zituzten, baina, urteek aurrera egin ahala, gora egin du egoiliarren kopuruak eta okerrera egin du hainbaten egoera fisikoak ere.
Hori dela-eta, eguneko zentroak egun batez ixteko ohitura alde batera utzi behar izan zuten, eta neurri berean, egunpasak egitea. Orain, ordea, Saiaz Gizarte Zerbitzuen Mankomunitateak berreskuratu nahi du ohitura, eta toki ezberdinetako adinekoak elkartuko dituzte, hain zuzen, bi egunetako zentroetako hainbat egoiliar, Tipi-tapa ekimenetako kideak eta eguneko arreta programako erabiltzaileak.
Elena Rikondo Saiaz Mankomunitateko langileak azaldu du «erronka» izan dela guztientzako irteera antolatzea, baina «ilusioz» hartu duela: «Askorentzat gauza berria da. Nabaritzen da gogoa badagoela, eta baita ilusioa ere».
Hari berari tiraka, adinekoentzat ekimenak «hainbat onura» dituela ere aipatu du, horien artean, aukera ematen diela etxetik zen herritik ateratzeko, esperientzia berriak izateko eta lagun edo harreman berriak egiteko.
