Gorritiko Sorogain frontoian jarri dute Aralarko Adiskideak elkartekoek bigarren kontrola XIV Orduak mendi martxarako. 08:00 pasatxoan iritsi dira lehen mendizaleak laino artean. Bidean, Uli inguruan, euri pixka bat izan dutela aipatu dute parte hartzaileek, baina eguraldia portatu dela nabarmendu dute. Lokatz handirik ere ez dute sumatu bidean.
Gorritin aurreneko aldiz, herriko ura jarri dute iturritik edateko eta mendizaleek bertan bete dituzte euren kantinplorak. Geldialdi laburra egin eta Lekunberrirako bidea hartu dute.
