Euskal preso, iheslari eta deportatuak Euskal Herrira itzultzeko bidea egin dezaten giltza herritarren eskuetan dagoela uste du Sarek. Horregatik, urrian dinamika berria aurkeztu zuen, Konponbiderako giltzak! lelopean, eta manifestu horri babesa helarazi diote gaur Aiztondoko udalek.
Manifestazioa 18:30etan abiatu da Zizurkilgo Joxe Arregi plazatik, eta Villabonako Errebote plazan izan du bukaera. Bertan, Aiztondoko udal ordezkariek euskal presoen eskubideen defendatzeko konpromisoa berresten dutela adierazi dute. Urruntze politikarekin amaitu arren, euskal presoek pairatzen dituzten «eskubide urraketak» oraindik ez direla amaitu salatu dute. Horregatik, Aiztondoko udal ordezkariek «tinko» salatu dituzte «euskal presoen etxeratzea oztopatzeko aplikatzen ari diren gradu erregresioak. Ez gara zigorgabetasuna eskatzen ari, zigorrak betetzeko legeak berak eskaintzen dituen aukera desberdinei ateak irekitzea baizik».
Horrenbestez, euskal presorik gabeko agertoki bat «ahalik eta azkarren» lortzeko itxaropena plazaratu dute, «hori izango baita herri honetan bakean eta elkarbizitzan aurrera egin dugunaren adierazlerik garbiena».