Jon Ander Peñak eta Iñaki Artolak elkarren aurka jokatu dute lehen jardunaldian eta 19-22 irabazi zuten Peña II-Abisuk Artola-Imazen aurka. Segurako Baratze pilotalekuan izan zen partida.
Erik Jakak Mariezkurrena II.arekin osatzen du bikotea, eta 22-7 irabazi zion Larrazabal-Aranguren bikoari Aizarnazabalgo Atari-Soro pilotalekuan. Lehen postuan jarri dira sailkapenean, aldeko eta kontrako tanto kopuruen aldearengatik.
Xabier Tolosak Ezkurdia aurrelari duela ari da parte hartzen txapelketan, eta lehen partidan Peio Etxeberriari eta Zabaletari 22-11 irabazi zioten, Azkoitiko Gurea pilotalekuan.
Falta den lehen jardunaldiko partida ostegunean jokatuko da, Eibarko Astelena pilotalekuan. Altuna III.aren ordez Elezkano II.a ariko da, eta Martijarekin batera Elordi eta Rezustaren aurka jokatuko dute.
Serie B Txapelketa
Bigarren mailako binakako txapelketan eskualdeko bi pilotari ari dira parte hartzen. Markel Iztueta atzelaria Agirrerekin batera ari da lehiatzen, eta lehen jardunaldian 22-19 irabazi zioten Alberdi II-Morgaetxebarria bikoteari. Gorka Ugartemendia atzelaria Zubizarreta III.arekin ari da lehian eta 22-11 irabazi zioten Senar-Eskiroz bikoteari.