Apirilaren 5ean, XXXI. Goñiren Oroimenezkoa Txapelketako finalak jokatu ziren Zumarragako Beloki pilotalekuan. Eskualdeko bi pilotarik elkarren aurka jokatu zuten binakako txapelketako finalean; Iñaki Elola bidaniarrak Lizeaga astigartarrarekin osatu zuen bikotea, Gorka Ugartemendia alkizarrak, berriz, Ander Muruarekin. Finalerdietan arazo larriak izan ondoren, Elolak final ona jokatu zuen, eta Muruak bikain lagunduta (txapelketako pilotari onena izendatu zuten), aise irabazi zieten aurkariei: 22-9. Horrela, bidaniarrak iaz irabazi ezin izan zuen txapela janztea lortu zuen.
Zumarragakoa izan zen Ugartemendia alkizarrak afizionatu mailan jokatu zuen azken partida. Izan ere, atzo egin zuen debuta profesional mailan, Tolosako Beotibar pilotalekuan. Lasoren laguntzaz, 22-17 irabazi zieten Peña II.a eta Iztuetari.