Lehen tanto bikain baten ondoren, hiru kale egin ditu Gorka Ugartemendiak jarraian. Hala eta guztiz ere ez da kikildu, eta ondoren etorri dira debuteko tantorik politenak. Pilota ezker-eskuin indartsu astintzeko gai dela erakutsi du alkizarrak. 1,91 metro altuerarekin, kantxan aurrera eta atzera dotore ibili da, betiere Unai Lasoren laguntza izugarria kontuan hartuta.
Beotibarren elkartu diren zaletuek gogotik gozatu dute Ugartemendiaren lehen partidarekin. Alkizatik jende ugari joan da Tolosara, instrumentu eta guzti. Harmailetan etengabeko babesa izan du, beraz, Gorka Ugartemendiak lehen partida honetan.
Gorka Ugartemendiaren hitzak debuteko partida ondoren:
- «Hasieran urduri sentitu naiz, hanketatik pixka bat makal. Unaik pilota asko kendu dizkit, eta gero, berotu naizenen, hanketatik ere oso ondo sentitu naiz. Azkenean irabazi egin dugu eta gustura».
- «Debutaren aurretik buruari buelta asko eman dizkiot. Orain behin jokatu dudala, gozatzea tokatzen da».
- «Eskuinarekin kosta egin zait, batez ere aurreko koadroetan. Ez naiz oso seguru sentitu. Atzetik ondo, eskuinarekin eta ezkerrarekin oso gustura ibili naiz. Orokorrean ondo esango nuke».
- «Bai herritarrak eta bai lagunak ilusio handiarekin zeuden. Soinu faltarik ez da izan pilotalekuan, eta pankarta ere dotorea egon dute. Eskertzekoa».