«Espero zen bezala, oso gogorra». Horrela deskribatu du Unai Iribarrek gaurko lasterketa. «Etapako lehen ordua oso azkarra izan da, hegan egin dugu. Ihesaldia maila handikoa izan da, eta atzetik oso azkar joan gara uneoro. Villabonatik igaro ondoren, kanporaketako proba bat izan da».
Iribarren hitzetan «pena handia» izan da ihesaldian sartu ezin izana. «Oso zaila izan da bertan egotea. Gero, lehenengo igoeran oso ondo sentitu naiz, baina hurrengoan eten txiki bat egon da eta hanka lurrera bota behar izan dut. Tropela asko luzatu da, eta atzean geratu naiz, moztuta. Amezketa heldu aurretik tropelera batu naiz, baina Abaltzisketako igoera hastearekin batera hankek «kito» esan dute, eta beste taldetxo batean joan naiz, helmugara arte. Azken aldapan ez dut esfortzu gehigarririk egin nahi izan».
Iribar nabaritzen ari da Euskal Herriko Itzulia World Tour mailako lasterketa dela. «Horrelako ibilbideekin, nahi edo ez, oso azkar joaten zara, tentsio handian. Kokapena oso garrantzitsua izaten da, eta inertziak berak egiten du lasterketa azkarra izatea».
Giro ederra izan da eskualdeko errepideetan, eta hori eskertu du Iribarrek. «Ederra izan da etxean aritzea, eta ezin naiz kexatu».