Txirrindularien segurtasuna bermatzeko, hirugarren etapako ibilbidean azken orduko aldaketak egin behar izan dituzte. Egindako aldaketarekin etapak 8,3 kilometro eta 3. mailako mendate bat gehiago izango ditu, Alkizarako igoera gehitu delako ibilbidera. Behin Trenbide ondoko bidetik Ateaga baserriko gainera igota, eta Anoeta eta Asteasuko bidegurutzean, 96,4 kilometroan, hain zuzen ere, eskuinetara egingo dute txirrindulariek, eta Asteasurantz abiatuko dira, ondoren Alkizara igotzen den errepidea hartzeko. Hasiera batean Anoetara zuzenean jaistekoak baziren ere, errepidea ez dago egoerarik onenean, eta txirrindularien segurtasuna bermatzeko, aldaketa hau egitea erabaki dute lasterketaren antolatzaileekin elkarlanean.
Aurrez, Andazarrateko gaina pasa ondoren, Asteasutik pasata, Villabonara iritsiko dira txirrindulariak. Alkizara igo eta Anoetara jaitsi ondoren, Altzotik (bi aldiz), Orendaindik, Amezketatik, Abaltzisketatik, Alegiatik, Leaburu-Txaramatik, Tolosatik, Anoetatik, Zizurkildik eta Adunatik igaroko dira, Amasa-Villabonako Hika txakolindegian amaitu aurretik.
