Eraiki, hezi eta gozatzeko

Eredu berritzailea darabilte Tolosako Inmakulada Lanbide Ikastolan eta arrakastatsua izaten ari da. Horren erakusle ikastetxean prestatutako langileen lan merkaturatze tasa da, %85tik gorakoa delarik.

Lanbide ikastolak eskaintza zabala du erdi mailako eta goi mailako zikloak eskaintzen dituelarik. Erdi mailako zikloei dagokienez, hiru ziklo eskaintzen dituzte: mendekotasun egoeran dauden pertsonei arreta eskaintzeko teknikariena, erizaintza laguntzailearena eta farmazia zein parafarmaziako teknikariarena.

Goi mailako lau ziklo dituzte: gizarteratzeko goi-mailako teknikariarena, irudi diagnosikorako eta medikuntza nuklearreko goi-mailako teknikariarena, osasun dokumentazioko eta administrazioko goi mailako teknikariarena, eta datorren ikasturtean lehen aldiz eskainiko duten audiologia protesikoko zikloarena. Era berean, etengabeko formakuntzarako eskaintza zabala dute; langileei zuzendutako akreditazio ikastaroak, langabetuei begirakoak eta ikastolak berak diseinatutako ikastaroak. Behin zikloak bukatuta ikasleak ez dira bakarrik formazio teknikoarekin ateratzen, langileek behar dituzten konpetentziak lantzen dituztenez, talde lana, komunikaziorako konpetentzia edo ikasitakoari lotutako ezagutza teknikoak bezalako gaiei lotutako esperientziak ere izaten dituzte. «Horretarako ikastolaren egunerokoa aberasten duten testuinguru formatzaile ezberdinak diseinatzen ditugu: boluntariotza ekimenak, elkarte eta eragile ezberdinekin elkarlanak eta proiektuak, komunitateari lotutako zerbitzuen eskaintza...».

Ikasleei hausnarketa kritikoa sustatzeko erremintak eskaintzea dute helburu: «Kudeaketa sistema aurreratuenetan oinarriturik, gure ikasleei, metodologia aktiboak erabiliz, prestakuntza berritzailea eskaintzen diegu, eredu propioan oinarrituz. Prestakuntza honek gure ikasleen garapen integrala eta gure gizarteak eta inguruko enpresek eskatzen dituzten konpetentzien eskuratzea ziurtatuko ditu».

Horren adibide dira orain arte garatutako hainbat proiektu, hala nola, Gipuzkoako Foru Aldundiarekin batera garatutako Adinberri proiektua edo Tolosaldea Garatzen, Zutani eta Enplea-rekin batera abiarazitako Josi ta Josi ekimena.