Ikasleen garapen integrala helburu

Hezkuntzari lotutako bi zikloak dira horiek, baina badituzte ere langileei zein langabetuei begirako ikastaro ugari. Eta guzti hori gaur egungo gizartea zeharkatzen duten beste hainbat ikuspegirekin uztartzen dituzte. «Prestakuntza honek, genero berdintasunean, gure ikaslearen garapen integrala eta gure gizarteak zein inguruko enpresek eskatzen dituzten konpetentzien eskuratzea ziurtatzen du», esan dute. Azken urteetan Lanbide Heziketak hainbat aldaketa izan ditu behar berrietara egokitu ahal izateko eta Don Bosco ez da atzean geratu. Formazio eta lan beharrei ahalik eta prestatuen egoteko eta Garapen Jasangarriko Helburuetara iristeko bestelako erakunde eta eragileekin batera egiten dute lan. Eta horri begira hainbat proiektu garatzen dituzte, hala nola, Iratzetik Paperera izenekoa. Proiektu horren helburu nagusia da papera eskuz egiteari buruzko ezagutza sortu eta transmititzea, gizarte bazterkeria pairatzeko arriskuan dauden pertsonen eta Lanbide Heziketa zikloetako ikasleen ekintzailetza eta laneratzea sustatzen laguntzeko. Badute ere elikagai funtzionalak eta dieta pertsonalizatuak garatzeko proiektu bat ere. Proiektu horrek super-elikagaiak edo elikagai aberastuak barnebiltzen ditu, «herritarren osasuna bermatzeko eta jaterakoan gozatzeko gaitasuna atzean utzi gabe».

Terapia aurreratuetako sendagaiak ekoizteko errealitate birtuala garatzen dute ere. Proiektuaren barruan sendagai horien ekoizpenerako ezinbestekoak diren gela garbietarako sarrera prozesuak simulatzen dituzte. Bukatzeko ilearen ekonomia zirkularra lantzen dute. Hau da, ekonomia zirkularra ardatz hartuta, ile apaindegietan sortzen diren hondakinen berrerabilera eta gutxitzea bultzatzeko prozesua eta sentsibilizazioa lantzen dituzte. Ile apaindegietako hondakin kimikoak xurgatuko dituen iragazketa sistema diseinatzen eta proposatzen dute.