Asiar jatorria du zimitz arreak —Halyomorpha halys—, baina dagoeneko eskualdeko herrietara eta etxeetara iritsi da. Jada Ameriketako Estatu Batuetan, Zeelanda Berrian, Australian eta Erresuma Batuan bizi da, eta Herrialde Katalanetan, esaterako, 2016az geroztik dago. Ez dela gauza berria dio Jon Ander Galarraga biologoak. «Gurean orain gehiago agertzen ari dela ematen du», dio, baina ez duela Gipuzkoari edota Tolosaldeari dagokion datuen edo ikerketen berririk azaldu du.
Globalizazioan jarri du azpimarra biologoak: «Itsasontzietan bidaiatzen du, eta hori intsektu askorekin gertatzen da. Egurraren gainean doa, barrualdeetan ezkutatu egiten da babesa aurkitzeko... eta horrela mundu guztian zehar bidaiatzen du». Globalizazioak intsektu, fauna eta floran ere eragin zuzena duela esan du.
Klima aldaketari lotuta, ez dela tenperatu igotzea soilik azpimarratu du: «Horregatik gauza asko ari dira gertatzen; oso lasai gaude, baina honelakoak gero eta ohikoago bilakatuko dira».
«KEZKA PUNTU BAT»
Aurrez aipatu moduan, Herrialde Katalanetan 2016az geroztik ugaritzen ari den intsektua da, eta iparralderantz doala esan du: «Klima aldaketa dago, gure isurialde honetan klima epelagoa eta lehorra bihurtzen ari da, eta zimitz arrearentzako egokiagoa da». Garraio bidez zabalpenean lagundu egiten diogula nabarmendu du, eta berari egoki datozkion eremuak topatzen ari dela argitu du.
Beldurra aipatu du, eta asiar liztorra datorkiola burura: «Sagarrondoei eragiten die. Sagarrak xurgatzen ditu, sagarraren azala hondoratuta bezala azaltzen da, eta sagar bati asko erasotzen badio, sagarra desitxuratu egiten du».
Ez du alarmarik piztu nahi izan, baina «kezka apur batekin» hitz egin du biologoak: «Sagarrondoak erasotzen ditu, eta gure ikono den fruitua da». Edozein fruta arbola izan daitekeela argitu du, eta baita hostoak ere; «Ameriketako Estatu Batuetan sagarrondoekin egin dituzte ikerketak, eta sagarrei asko eragiten diela ikusi dute».
Landareak inguruan dituzten etxeetan gehiago agertzen dira, baina nahiz eta kalean bizi, zuhaitzez inguratuta bada, etxe horietan ere agertu daitezkeela azaldu du Galarragak.
