Bozketa fasean bete-betean sartuta, Ataria-ren Udako Argazki Lehiaketako gustukoenak bozkatzeko unea da orain. Aurtengo udan ateratako 200 argazki baino gehiagoren artean hiru saridunak aukeratzeko. irailaren 28ra bitarte bozkatu ahalko da webgunearen bitartez, Argazki Lehiaketa atalean, eta argazki irabazleak eta hauen egileak irailaren 30ean jakinaraziko dira Ataria astekarian eta Ataria.eus webgunean.
Sari ederrak eskuratzeko aukera dago aurten ere, Udako Argazki Lehiaketan parte hartuta. Epaimahaiaren saria lortzen duenak Opari Bonu Orlegia eskuratuko du, hau da, bi pertsonarentzako bi gaueko egonaldia, logela eta gosariarekin, Nekatur Nekazalturismo elkartearen eskutik. Bestetik, Ataria.eus-eko erabiltzaileen saria ere lortu ahal da, eta kasu honetan, lau pertsonarentzako otordua jasoko du irabazleak Orexako Ostatuan. Eta, azkenik, Atarikideen saria lortu ahal da, lehiaketan parte-hartu duten Atarikideen artean. Tolosako Richard Argazkilariak-en eskutik, Instax Mini 11 kamera zozkatuko da guztien artean.