Realak urte historikoa egin du, beraz, eta horren errudun nagusietako bat Natalia Arroyo entrenatzaile kataluniarra da. Arroyoren bigarren denboraldia izan da bukatu berri dena, eta iaz erakutsitako maila koska bat gehiago igo du. Jokalariei ere, noski, eman behar zaie bere meritua, are gehiago denboraldia hainbat aldaketekin hasi zelako. Jokalari ugarik utzi zuten taldea eta Realarentzat urte zaila izango zela uste zen, baina taldeak konfiantza handiz jokatu du, bigarren postu hori lortuz.
Jokalarien artean bi dira eskualdekoak: Nerea Eizagirre tolosarra eta Izarne Sarasola ibartarra. Protagonismo berezia izan du Eizagirrek, taldean izandako aldaketak direla-eta bera izendatu baitzuten kapitaina. Sekulako denboraldia egin du, nortasun handia erakutsiz eta hamasei golekin taldeko bigarren golegilea bihurtuz. Sarasolarentzat urte ahaztezina izango da, lehen taldean debuta egin duelako, eta Realaren urte historikoaren parte izan delako. Orain Txapeldunen Ligaren atarikoa jokatzea tokatuko zaie, eta beste pauso bat eman nahiko dute, lehiaketaren ligaxkan sartuz. Espainiako Ligan erakutsitako maila berretsi nahiko dute Europako talde onenen aurka, baina oraingoz ondo merezitako oporrak izango dituzte.
