Tolosako plazan ez ezik, eskualdeko txikienek ere inauterien hasiera ospatu dute hainbat ikastetxeetan egin dituzten jaialdietan. Txupinazoarekin batera, lehenak izan ziren Anoetako herri ikastola, Tolosako Herrikide, Samaniego eta Laskorain ikastetxeetan, Ibarrako Uzturpe ikastola, Berrobiko eskola eta Villabonako Fleming ikastetxea. Mota guztietako mozorroak ikusi ahal izan ziren tartean; animaliak, pailazoak, ipotxak, indiarrak eta irlandarrak, besteak beste. Musika eta dantza egin ostean, indarrak berreskuratzeko txistorra pintxoa jan zuten.
Ostiral Mehean, berriz, Aduna, Larraul, Zizurkilgo Pedro Maria Otaño, Asteasuko Pello Errota eta Alkizako ikastetxeen txanda izan zen. Musika eta dantza ez ezik, antzerkia, Loatzo Musikako eskolak eskainitako konpartsa eta kalejiraz gozatzeko aukera ere izan zen.