Bigarren urtez jarraian, osasun egoerak baldintzatuta, Sarek urte hasieran antolatzen dituen euskal presoen aldeko mobilizazioak herriz herri egin dira, Ipar Euskal Herrian ezik, han Bakegileek deituta, Baionan egin baitute manifestazioa.
Hego Euskal Herriari dagokionez, 200 herri ingurutan egin ditu mobilizazioak Sarek euskal presoen hurbilketa eskatuz, "salbuespenik eta atzerapenik gabe", baita espetxe-baimenak eta baldintzapeko askatasuna ere.
Tolosaldean, Alegian, Anoetan, Berastegin, Ibarran, Iruran, Lizartzan, Tolosan eta Villabona eta Zizurkil artean izan dira mobilizazioak. Tolosaren kasuan, Trianguloa plazatik abiatuta egin dute manifestazioa. Batukada feministaren doinuek girotu dute manifestazio hasiera, eta manifestazioan zehar txarangak alaitu du protesta. Bada, alde zaharrean zehar ibilbidea egin eta gero, Ibarrarantz abiatu da manifestazioa, herri sarreran Ibarrako mobilizazioarekin elkartzeko.
Karmele Elizaran eta Josune Agirrezabala Sareko kideek esan dutenez, egoerak azken hilabeteetan hobera egin duen arren, oraindik asko dago egiteko: "Lehen fasea bukatzeko preso guztiak Euskal Herriratu egin behar dira, hor amaituko da urrunketarekin. Hortik aurrera, bigarren eta hirugarren graduak lortzen joatea izango da hurrengo pausoa. Poliki doa, baina, aurten espero dugu urrunketarekin eta salbuespen legediarekin amaitzea".
