Azken lau postuetan amaitu dute lehen itzulia

Urte berrian sartzearekin batera, binakako txapelketaren lehen fasea heldu da ekuatorera. Bikote guztiek jokatu dute elkarren aurka, eta espero zitekeen moduan, ez da sorpresa larririk izan. Akaso, pilotazale gehienek Peña eta Albisu edota Jaka eta Mariezkurrena postu batzuk gorago egotea espero zuten. Hala ere, euren maila onena ez ematearen eta gainerako bikoteen erakustaldi handien ondorioz, nahiko lituzketenak baino puntu gutxiago eskuratu dituzte.

Hain justu, lizartzarra izan zen zazpigarren jardunaldiko lehen partida jokatu zuena. Mariezkurrena II.a ordezkatu zuen Andoni Aretxabaletarekin osatu zuen bikotea, Tolosako Beotibar frontoian, abenduaren 30ean. Aurrean, berriz, orain arteko bikote onena: Elezkano II-Zabaleta. Baikoko bikoteak ezin izan zuen Aspekoak ezarritako erritmoa jarraitu, eta azkenean, 22-11 galdu zuen.

Altunak jokatu zuen hurrengo partida, Urte Berri egunean. Martijarekin batera, Laso eta Imaz izan zituzten aurkari, Eibarko Astelena pilotalekuan. Emozio handiko partida izan zen, inork galdu nahi ez zuena; puntu garrantzitsua zegoen jokoan, eta amaieran, tentsio handiko momentuak bizi izan ziren. Horren erakusgarri, azken emaitza: 22-21, Aspeko bikotearen alde. Urdulizen jasotako kolpearen atzetik, garrantzia handiko bi garaipen lortu dituzte, eta jada sailkapeneko goiko postuetako bikoteen puntu kopuru berdina eskuratu dute.

Hurrengo egunean, Donostiako Atano pilotalekuan jokatu zuen partida Jon Ander Peñak. Albisurekin batera, Irribarria eta Rezusta izan zituzten aurkari. Ez zen partida ona izan, bi bikoteek tanto asko oparitu zituztelako, baina azkenean, Baikokoentzat izan zen garaipena: 22-16. Lehen jardunaldian lortutako puntuarekin zegoen Baikoko bikotea; geroztik, ez zuen garaipenik lortu, eta beraz, ezinbesteko puntua eskuratu zuten igandean.

Azkenik, atzo, Tolosako Beotibar pilotalekuan antolatu zuten enpresek lehen itzuliari amaiera eman zion jardunaldiko azken jaialdia. Bertan, Ezkurdiak eta Tolosak, Urrutikoetxea eta Arangurenen aurka jokatu zuten. Ez da txapelketa ona egiten ari Aspeko bikotea, eta atzo ere, partida txukuna egin arren, ez zuen garaipena lortu: 22-18 gailendu zen Baikoko bikoa.

Etzi hasiko da zortzigarren jardunaldia, bigarren itzuliko lehena. Berriro ere, enpresa bereko bikoteak elkarren aurka ariko dira. Urtarrilaren 6an, Jaka-Mariezkurrena bikoteak Laso-Imaz bikotearen aurka jokatuko du, Eibarren. Urtarrilaren 7an, Altunak eta Martijak, Irribarriaren eta Rezustaren aurka neurtuko dituzte indarrak, Zallako Mimetiz frontoian. Hilaren 8an, berriz, Ezkurdiak eta Tolosak, Elezkano-Mariezkurrena bikotearen aurka jokatuko dute, Iruñeko Labriten (jaialdiko lehen partidan, Artolak eta Erasunek elkarrekin jokatuko dute, Agirre-Aretxabaleta bikotearen aurka). Azkenik, urtarrilaren 9an, Peñak eta Albisuk, Urrutikoetxearen eta Arangurenen aurka jokatuko dute, Getariako Sahatsaga pilotalekuan. Beraz, eskualdeko pilotariek garaipen bana lortzeko aukera dute aste honetan; garrantzi handiko garaipena izan daiteke gainera.

Une honetan, horrela dago sailkapena:

Elizegiren lehen porrota

Igandean Donostian antolatutako jaialdian, Oinatz Bengoetxea eta Jon Erasun omendu zituzten. Zizurkildarrak jaialdiko azken partidan jokatu zuen, promozio mailako txapelketakoan, Salaverri ordezkatuz. Baikokoek galdu egin zuten, Victorren eta Gaskueren aurka, 22-17.

Hain zuzen, Iker Elizegi asteasuarra da promozio mailako txapelketan dabilen eskualdeko ordezkari bakarra. Atzo jokatu zuen Tolosan, Arteaga II.arekin batera, Salaberria-Erostarbe bikotearen aurka. Bakaikoarekin bikotea osatuz, ordura arte jokatutako sei partidak irabazi zituen Baikoko bikoteak. Atzo, ordea, galdu egin zuten: 22-14. Hain justu, bi bikote hauek dira sailkapeneko lehen postuan daudenak, seina punturekin berdinduta.

Etzi, Errege Egunean, jokatuko du zortzigarren jardunaldiko partida Iker Elizegik, berriro ere, Arteagarekin batera. Larrazabal-Salaverri enpresa bereko bikotearen aurka jokatuko dute, Eibarren; 17:00etan hasiko den jaialdiko lehen partida izango da.