Intxurre Pilota Eskolak jada martxan jarria du XIX. Gabonetako Pilota Topaketan izena ematea. Alegia, Altzo, Amezketa eta Ikaztegietako guraso elkarteen laguntzarekin, Abaltzisketako, Alegiako, Altzoko, Amezketako eta Ikaztegietako eskoletan banatu dute deialdia, eta baita Alegiako Aralar Institutuan ere. Ikastetxeetan banatutako orrien bidez egin beharko da izen ematea, eta horretarako azken eguna, hilak 10, ostirala, da.
Abaltzisketa, Alegia, Altzo, Amezketa eta Ikaztegietako eskoletan egingo dute izen emateen bilketa. Hala eta guztiz ere, norbaitek izen emate orria beharko balu edo zalantzaren bat argitzea nahiko balu
udakopelotaeskola2021@gmail.com helbide elektronikora idatzi dezake. Partaideek banaka eman behar dutela izena zehaztu dute antolatzaileek, eta beraiek egingo dituztela bikoteak, dagokien adin mailetan banatuta (6 adin-maila egingo dituzte).
6 eta 15 urte bitartekoek –2006-2015 bitartean jaioak–, biak barne, eman dezakete izena. Prebenjamin, Benjamin, Alebin, Infantil, Infantil/Kadete Neskak eta Kadete Mutilak dira banatuko dituztenak. Nesken kasuan, eskuz, infantilak eta kadeteak elkarrekin jarriko dituzte. Eta, eskuz, pilota goxoekin jokatuko dute.
Topaketaren egunak ere aurreratu ditu Intxurre eskolak. Sailkapenak, abenduaren 27an eta 28an jokatuko dira; hori bai, herriak eta orduak, izen ematearen arabera zehaztuko dituzte, eta hilaren 17an emango dituzte ezagutzera bikoteak eta egutegia.
Finalak Amezketako pilotalekuan jokatuko dira, hilaren 30ean, ostegun arratsaldez. Ondoren, sari banaketa egingo dute, eta bertaratzen direnentzat merienda banatuko dute.