Azaroan, eskualdeko ospitalea eraikitzeko hamahiru kokaleku posible zehaztu zituen Tolosako udal gobernuak abiatutako azterketak. Urtarrilean, azterketa hori gehiago zehaztearen ondorioz, lau gune egokienak definitu ziren. EH Bilduk azaldu duenez, martxoan Eusko Jaurlaritzak kokaleku horietako baten aldeko txostena bidali zion Tolosako Udalari. Horren arabera, Jaurlaritzak Tolosako suhiltzaile etxearen aurrean dagoen kokalekuaren alde egingo luke.
Horren aurrean Tolosako Udalak esan du kokaleku egokiena aukeratzeko prozesuak martxan jarraitzen duela. «Alderdi gehiago hartu behar dira kontuan, ez irisgarritasuna eta gertutasuna bakarrik». Esan dute, era berean, udala Eusko Jaurlaritzarekin elkarlanean ari dela, eta Jaurlaritza «une oro» izaten ari dela udala egiten ari den azterketaren eta kokalekuen berri. «Lau gune horien azterketa egin behar da», gaineratu du.