Trikiti doinuak izan ohi dira nagusi Ataria Irratian larunbat goizetan. Eta horrekin batera, azken urteetan trikitian gehiago sakontzeko, trikitiaren historia ezagutzeko, berritasunak entzuteko edota trikitilariei ahotsa emateko trikitiari buruzko Hauspo Artean saioa ere izan dugu. Bada, bihar ekingo dio saioaren ibilbide berriak. Izan ere, Ander Malbadik eta Eneritz Aulestiak gidatu dute saioa azken urteetan, eta denboraldi berrian, Maixa Lizarribarrek eta Manex Torrealdaik hartuko dute saioaren gidaritza.
Bihar, 12:00etan izango da saioa Ataria irratian entzungai, eta ondoren, webgunean izango da, noiznahi entzuteko aukera izango delarik. Lizarribarrek eta Torrealdaik azaldu dutenez, gonbidatuko dituzten trikitilariei gertuko galderak «guztiok jakin nahi ditugunak» egingo dizkiete. Bada, saioaren lehen gonbidatua Itsaso Elizagoien etxalartarra izango da. Bere bizipenez, gaur egungo egoeraz edota etorkizunaz ariko dira solasean.