Pezetak biltzen jarraituko dute

Buru Bihotzez elkarteak dementzia duten pertsonen autonomia eta integrazioa garatzen laguntzeko eta zaintzaile diren senitartekoak babesteko helburuarekin Dementzia Bizitzen proiektua diseinatu du, eta hori garatu ahal izateko, pezetak biltzeko kanpaina jarri zuen martxan pasa den urtean. Bada, Espainiako Bankuak pezetak aldatzeko epea ekainera arte luzatzea erabaki du, eta ondorioz elkarteak bilketa kanpaina mantentzea erabaki du.

Buru Bihotzez elkartetik jakinarazi dutenez, pezeta zaharrak biltzeko kanpainak harrera ona izan du, abendura bitarte 150.000 pezeta jaso dituztelarik. «Tolosaldeko herritar askok parte hartu dute, beren dohaintzak emanez establezimendu solidarioetan, beraz, eskerrak eman nahi dizkiegu guztiei laguntzeagatik».

Kanpaina luzatzea erabaki dutenez, herritarrei parte hartzeko deia egin diete beste behin. «Ahalik eta pezeta gehien bildu aukera gehiago izango dugu Dementzia Bizitzen programa abian jartzeko, eta modu horretan, bizi kalitatea hobetzen lagunduko duten ekimenak bultzatu ahalko ditugu», esan dute elkartetik. «Egin dezagun posible, galdutako eta inolako baliorik gabeko pezeta batzuk itxaropen solidario eta konprometitu bihurtzea Alzheimerra eta beste dementzia batzuk pairatzen dituztenekin». Buru Bihotz elkarteak gogoratu du Tolosaldean 650 bat familiak egiten dituztela zaintzaile lanak eta laguntza behar dutela.

Pezeta zaharrak Tolosako Kopybat, Shuyana, Soronea eta Berezi dendetan, La Huerta eta Eko Tolosa fruta dendetan, Goikoetxea estankoan; Alegiako Maritxu janari dendan; Ibarrako Coviran eta To pa Ty dendetan; eta Villabonako Musturinea harategian utzi ahalko dira, bertan jarritako itsulapikoetan.