Tolosa CF Atletismoko lau atleta izan dira 16 urtez azpiko Espainiako Txapelketan asteburu honetan, eta bi brontzezko domina lortu dituzte. June Sudupe eta Manex Civico izan dira podiumera igo direnak.
June Sudupe hernialdearrak 600 metroko proban lortu du hirugarren sailkatzea, bigarrenaren denbora berarekin, 1.37,00 hain justu. Lortutako marka horrekin 16 urtez azpiko Gipuzkoako marka hobetzea lortu du. Manex Civico tolosarrak 3.000 metrotako proban lortu du hirugarren postua. Bere marka pertsonala egin du 9.12,65ko denborarekin.
Ane Martin tolosarrak ere 3.000 metroko proban parte hartu du eta finalista postua lortu du, 8. eginez, 10.53,55ko denborarekin. Bere aldetik, Ander Aristi larrauldarrak 300 metro hesietan parte hartu du eta finalista izan da, azken proban zazpigarren eginez, 41,75ko denborarekin.