Ospitale publikoari buruzko argibideak eskatu dituzte

PSE-EE alderdiko Berrobiko eta Larraulgo alkateek gutun bat bidali diote Gotzone Sagardui Osasun sailburuari bilera bat eskatuz. Bileran Tolosaldeko ospitale publikoari buruz hitz egin nahi dute, "lehen eskuko informazioa jasotzeko".

David de Miguel Berrobiko alkateak eta Maite Arana Larraulgoak bidali dute gutuna, Andoaineko Maider Lainez alkatearekin batera. Tolosaldeko ESI-aren zuzendari-kudeatzaile Marisa Merinori ere eskatu diote bilera bat "zerbitzuaren erabiltzaileen kexak helarazi ahal izateko".

Sagardui sailburuari bidalitako gutunak Olatz Peonek pasa den astean egindako adierazpenak ditu ardatz.  "Gutunean bilera bat eskatzen diogu ospitale publikoa egiteko proiektuaren inguruko informazioa eskatzeko eta Eusko Jaurlaritzaren eta Asuncion klinikaren arteko kontzertazioaren eta Belate (Tolosa) zein Andoaingo anbulatorioen inguruko kezka azaltzeko. Hain justu anbulatorio horietan Tolosaldeko biztanleei osasun arreta espezializatua emateko", esan dute.

Era berean, Sagarduiri gogoratu diote Berrobi, Larraul eta Andoaingo udaletan Inviza SA enpresak –Asuncion kudeatzen duen enpresa– azkenaldian ematen duen zerbitzuari buruzko kexak jasotzen ari direla herritarren partetik. "Ezinegon horren berri emango diogu ere Marisa Merino Tolosaldeko ESIko zuzendari-kudeatzaileari", gaineratu dute.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!