Izan Bidea ekimenaren barruan, Sarek euskal preso eta iheslarien etxeratzearen eta bakearen zein elkarbizitzaren aldeko aldarriak eman asmo zituen larunbatean Euskal Herriko tontorretara. Eguraldi iragarpena kontuan hartuta, baina, ekimena atzeratzeko erabakia hartu du dinamikak.
"Ekimen honi begira sortutako ilusioa, egindako lan izugarria eta animatu den herritar kopurua aintzat hartuta, 2021eko maiatzaren 8ra atzeratzea erabaki dugu, mendi tontorren igoera historiko hau baldintza egokietan egiteko aukera izango dugula ziurtatzeko", azaldu dute. Hala, izena eman dutenei ekimenaren parte izaten jarraitzeko eskatu die Sarek.
Larunbat honetarako, bestalde, mendietara igoko ez badira ere, herrietan elkartzeko deia luzatu dute. 12:00etatik 13.00etara bitarte elkartu, argazkiak egin eta sare sozialetan zabaltzera animatu dituzte herritarrak, "gure aldarria zabaldu eta milaka garela erakutsiz".