Osasungintzako sindikatuek deituta egin zuten protesta atzo lehen arretako zentroetan, baina ez da lehena izango: irailaren 25ean ospitaleen sarreran biltzera deitu dute, eta urriaren 3an, berriz, manifestazioa egingo dute Bilbon.
Osasun sistemaren gabeziak «ageri-agerian» utzi ditu koronabirusak, SATSE, ELA, LAB, SME, CCOO, UGT eta ESK sindikatuek salatu dutenez. «Egiturazko arazoak» baitira egunerokoan dituztenak, eta ez COVID-19ak sortuak: «Krisi sanitarioak ederki asko erakusten digu azken urteetako murrizketek osasun publikoa ahuldu dutela», salatu du LABek, denen izenean. Arazo horiei «heltzeko» eskatu diote Osakidetzari mobilizazioen bidez: «Protestekin hasi beste erremediorik ez daukagu, Osakidetzak sakoneko arazoei benetan hel diezaien».