Azken maldatxoan, Zerainera igotzen bost txirrindularik alde egin zuten, tartean Iribarrek, baina helmugarako 300 metro falta zirela 20 txirrindulariko talde batek harrapatu zien, eta orduan bideratu zuten esprinta eta ibartarra izan zen azkarrena.
Euskaldun torneoan elite mailakoek (25 urtez azpikoek) eta 23 urtez azpiko mailakoek parte hartzen dute. Euskaldun torneoan bigarren postuan doa sailkapen orokorrean ibartarra, 56 punturekin. Aurretik Baque Team taldeko Jon Barrenetxea doa, 69 punturekin.
Larunbat honetan Oñatiko proban parte hartuko du Iribarrek, Lehendakari torneoaren barruan. Torneo horretan 23 urtez azpiko txirrindulariek parte hartzen dute. Oñatiko proba torneoko hirugarrena eta azkena izango da, eta Iribar doa sailkapen buru 35 punturekin. Joseba Lopez doa bigarren postuan, 26 punturekin. Iribarrek azaldu du bere asmoa lehen postu hori mantentzea dela.
ERLOJUPEKO TXAPELKETA
Eskualdean jokatuko da igande honetan Gipuzkoako Erlojupeko Txapelketa, Alegian, hain justu. Gizonezkoen junior mailakoak izango dira lehenengoak parte hartzen, 10:00etan hasita, eta 18,5 kilometro egingo dituzte. Limousin-Oriako taldeko Imanol Morales tolosarrak, Arkaitz Garmendia berastegiarrak eta Unai Zubeldia ibartarrak parte hartuko dute.
Emakumezkoen proban junior eta 23 urtez azpiko mailetakoak ariko dira, 11:00etatik aurrera, eta 18,5 kilometro egin beharko dituzte. Bertan parte hartuko dute Gipuzkoa Ogi Berriko Eukene Larrarte tolosarrak eta Sopela taldeko Naia Amondarain ibartarrak 23 urtez azpiko mailan, eta Limousin-Oriako taldeko Xubane Garaik, Kattalin Iriondok eta Lur Zufuriak junior mailan.
Gizonezkoen elite eta 23 urtez azpiko mailetakoak 12:15ean hasiko dira eta 25 kilometro ibilbidea izango dute. Laboral Kutxako Iñaki Diaz tolosarrak parte hartuko du bertan.