Artolak eta Rezustak sendo jarraitzen dute lehen postuan

Argazkia: BAIKO

Alegiarrak eta bere bikoteak 19-22 irabazi diote Elezkano II.a eta Aretxabaletari Caixabank Masters txapelketako hamaikagarren jardunaldian. Altuna III-Imaz bikoak tanto batengatik galdu dute Olaizola II-Zabaletaren aurka, baina bigarren postuan jarraitzen dute.

Artolak eta Rezustak amaierara arte borrokatu behar izan zuten atzo CaixaBank Masterseko hamargarren puntua lortzeko. Elezkano II.a oso aktibo egon zen partida osoan zehar eta behin baino gehiagotan lortu zuen bikote urdina ezegonkortzea. Aretxabaletak aste batzuetako etenaldiaren ondoren ondo lagundu zion Zaratamoko aurrelariari. Azkenean, asko landutako puntua izan zen Artola-Rezustarentzat. 

Jokin Altunak eta Imaz bere atzelariak ezin izan zuten punturik lortu Olaizola II-Zabaletaren aurka larunbatean jokatutako partidan. Hori bai, aurreikusten zenaren mailakoa izan zen neurketa. Gorriak atzetik joan ziren partida osoan zehar, baina azken txanpan hobeto bukatu zituzten tantoak eta 22-21 irabazi zuten, aurka izan zuten 18-21eko markagailua iraulita. Garaipen horrekin, Olaizola II-Zabaletak Altuna III-Imaz harrapatu dituzte sailkapenean. Ligaxkaren amaieran berdinduta baleude, tanto aldea nafarrentzako izango da.

Gaur jokatuko den Urrutikoetxea-Irribarria eta P. Etxeberria-Albisu arteko partidaren faltan, horrela dago sailkapena:

1.Artola-Rezusta                          10-1
2. Altuna III-Imaz                        7-4
3. Olaizola II-Zabaleta                7-4
4. Bengoetxea VI-Martija           7-4
5. Ezkurdia-Aranguren               6-5
6. Jaka (P. Etxeberria)-Albisu   5-5
7. Elezkano II-Aretxabaleta       1-10
8. Urrutikoetxea-Irribarria       0-10

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!