III. Euskal Pentatloi saria Azpeitian jokatuko da eta lehiakideen artean, eskualdeko bi kirolari arituko dira: Xabier Orbegozo Arria V.a, Ibarran bizi den errezildarra; eta Iñaki Errazkin tolosarra. Irailaren 5ean, aurrez aurre izango dituzte beste hamalau lehiakide. Norgehiagoka arratsaldeko seietan hasiko da, Azpeitiko zezen plazan.
Pentatloia, guztira, bost probak osatzen dute eta bakoitzean erronka ezberdin bati egin beharko diote aurre: harriarekin, 100 kiloko bola hamar aldiz jaso beharko dute; giza proban, plaza bateko joan etorria bete beharko dute; aizkoran, 54 ontzako eta 45 ontzako enbor bana moztu beharko dituzte; txingekin, hiru plaza egin beharko dituzte eta korrika, kilometro bat egin beharko dute.
Urtebete atzera
Iaz ere Azpeitian jokatu zuten Euskal Pentatloi saria. Txanda hartan Joseba Otaegi zizurkildarrak bigarren postua eskuratu zuen, eta Arria V.a hirugarrena izan zen. Irabazlea Xabier Zaldua izan zen, jarraian, bigarren urtez.
Besteak beste, irailaren 5eko lehian izango dira joan den urteko irabazlea eta baita Arria V.a ere. Otaegik, ordea, ez du parte hartuko aurten.