Asteburuan jokatu diren bi estropadatatik, bietan azkarrena izan da TAK. Lehen proba larunbatean jokatu zen, Bilbon. 10:55,05 denborarekin, helmugara iritsi zen lehen taldea izan zen Tolosaldea. Hurrenez hurren iritsi ziren Hibaika eta Ondarroa Cikautxo.
Atzo, berriz, Getxon izan zen estropada. Erandioko ikurrina lortzeko lehiatu ziren taldeak. Berriz ere norgehiagokako onena izatea lortu zuten Tolosaldeakoek: ziaboga 5:50 denborarekin egin zuten eta, helmugara iristean 11:12,53 minutuan geratu zuten ordularia. Deusto taldea, bost segundo beranduago iritsi zen, bigarren postuan; Hibaika izan zen hirugarren onena, bigarrena baino segundo bat beranduago.
ETE Liga amaitzeko bi estropada falta dira oraindik, baina, Tolosaldeak asteburuan bildu dituen puntuekin, matematikoki ligako txapelduna da. Hau da, sailkapen orokorrean bigarren postuan dagoen taldeak hurrengo bi estropadak irabaziko balitu ere, TAK izango litzateke ligako irabazlea, bi postuak banatzen dituen puntu errentagatik.
ETE Ligako sailkapen orokorra:
1. Tolosaldea: 88 puntu
2. Hibaika: 64 puntu
3. Zumaia: 64 puntu
4. Deusto: 58 puntu
5. Ondarroa Cikautxo: 58 puntu
6. San Juan: 51 puntu
7. Isuntza: 31 puntu
8. Lutxana: 25 puntu
9. Lapurdi: 10 puntu
Datorren asteburuko bi estropadak Castro Urdialesen (Kantabria) izango dira. Bana larunbatean (hilak 29) eta igandean (hilak 30).